ਅੱਪਰਾ ਨੇੜੇ ਪਿੰਡ ਮਸਾਣੀ ਵਿਚ ਸਥਿਤ ਇਕ ਸ਼ੈਲਰ 'ਤੇ ਕੰਮ ਕਰਨ ਲਈ ਆਏ ਇਕ ਪ੍ਰਵਾਸੀ ਮਜ਼ਦੂਰ ਦੀ ਛੱਤ ਤੋਂ ਡਿੱਗਣ ਕਾਰਨ ਮੌਤ ਹੋ ਜਾਣ ਦੀ ਖ਼ਬਰ ਮਿਲੀ ਹੈ।ਜਾਣਕਾਰੀ ਦਿੰਦੇ ਹੋਏ ਏ. ਐੱਸ. ਆਈ. ਸੁਖਵਿੰਦਰਪਾਲ ਸਿੰਘ ਸੋਢੀ ਚੌਕੀ ਇੰਚਾਰਜ ਧੁਲੇਤਾ ਨੇ ਦੱਸਿਆ ਕਿ ਬਸੰਤ ਰਾਏ ਪੁੱਤਰ ਦੇਵਲ ਰਾਮ ਵਾਸੀ ਪਿੰਡ ਗੋਲਮਾ, ਥਾਣਾ ਕੁਕੇਸ਼ਵਰ, ਜ਼ਿਲ੍ਹਾ ਦਰਭੰਗਾ, ਬਿਹਾਰ ਬਾਰਦਾਨੇ ਦਾ ਕੰਮ ਕਰਦਾ ਸੀ ਅਤੇ ਕੁਝ ਹੀ ਦਿਨ ਪਹਿਲਾਂ ਠੇਕੇਦਾਰ ਧਰਮਿੰਦਰ ਰਾਏ ਦੇ ਕੋਲ ਪਿੰਡ ਮਸਾਣੀ ਰੋਡ 'ਤੇ ਸਥਿਤ ਹਿਕ ਰਾਇਸ ਸ਼ੈਲਰ ਵਿਚ ਕੰਮ ਕਰਨ ਲਈ ਆਇਆ ਸੀ। 

ਬੀਤੀ 31 ਜੁਲਾਈ ਦੀ ਰਾਤ ਨੂੰ ਜ਼ਿਆਦਾ ਗਰਮੀ ਹੋਣ ਕਾਰਨ ਬਸੰਤ ਰਾਏ ਮਕਾਨ ਦੀ ਛੱਤ 'ਤੇ ਸੋਣ ਚਲਾ ਲਈ। ਰਾਤ ਸਮੇਂ ਤੇਜ਼ ਬਾਰਿਸ਼ ਅਤੇ ਹਨੇਰੀ ਆਉਣ ਕਾਰਨ ਉਹ ਅਚਾਨਕ ਅਤੇ ਕੁਦਰਤੀ ਤੌਰ 'ਤੇ ਥੱਲੇ ਡਿੱਗ ਗਿਆ ਜਿਸ ਕਾਰਨ ਮੌਕੇ 'ਤੇ ਹੀ ਉਸ ਦੀ ਮੌਤ ਹੋ ਗਈ। ਧੁਲੇਤਾ ਪੁਲਸ ਨੇ ਬੀ.ਐੱਨ.ਐੱਸ. ਦੀ ਧਾਰਾ 194 ਦੇ ਤਹਿਤ ਮ੍ਰਿਤਕ ਦੀ ਲਾਸ਼ ਦਾ ਸਿਵਲ ਹਸਪਤਾਲ, ਫਿਲੌਰ ਤੋਂ ਪੋਸਟਮਾਰਟਮ ਕਰਵਾਉਣ ਤੋਂ ਬਾਅਦ ਵਾਰਸਾਂ ਦੇ ਸਪੁਰਦ ਕਰ ਦਿੱਤੀ ਗਈ ਹੈ।